राष्ट्रवादी काँग्रेसमधील फुटीनंतर पवार कुटुंबीयांसाठी प्रतिष्ठेच्या झालेल्या बारामती लोकसभा मतदारसंघात पंतप्रधान नरेंद्र मोदी यांची सभा आयोजिण्याच्या हालचाली सुरू झाल्या आहेत.
पंतप्रधान नरेंद्र मोदी
पुणे ( DailyMarathiNews ): राष्ट्रवादी काँग्रेसमधील फुटीनंतर पवार कुटुंबीयांसाठी प्रतिष्ठेच्या झालेल्या बारामती लोकसभा मतदारसंघात पंतप्रधान नरेंद्र मोदी यांची सभा आयोजिण्याच्या हालचाली सुरू झाल्या आहेत. मोदींची सभा महायुतीच्या बारामतीसह मावळ, शिरूर आणि पुणे अशा महायुतीच्या सगळ्या उमेदवारांसाठी असेल, असा दावा करण्यात येत असला, तरी बारामती लोकसभा मतदारसंघात येणाऱ्या खडकवासला विधानसभा मतदारसंघात सभेच्या नियोजनासाठी राष्ट्रवादी काँग्रेस आग्रही आहे. येत्या एप्रिलअखेर किंवा मेच्या पहिल्या आठवड्यात ही सभा होईल, असा दावाही करण्यात येत आहे.
‘बारामती’मध्ये विद्यमान खासदार आणि शरद पवार यांची कन्या सुप्रिया सुळे आणि अजित पवार यांची पत्नी सुनेत्रा पवार यांच्यात लढत होणार आहे. राष्ट्रवादी काँग्रेसमधील फुटीनंतर शरद पवार आणि अजित पवार या दोघांसाठी ही लढत प्रतिष्ठेची झाली असून, सध्या या दोन्ही उमेदवारांकडून जोरदार प्रचार सुरू झाला आहे.
राष्ट्रवादी काँग्रेस दुभंगल्याने बारामतीमध्ये शरद पवार यांना घेरण्यासाठीचे प्रयत्न सुरू
गेल्या दोन वर्षांपासून भाजपनेही बारामती हा शरद पवारांचा बालेकिल्ला ताब्यात घेण्यासाठी कंबर कसली आहे. त्याच हेतूने गेल्या लोकसभा निवडणुकीतील ‘ए फॉर अमेठी’च्या धर्तीवर ‘बी फाॅर बारामती’ मिशन हाती घेण्यात आले. केंद्रीय अर्थमंत्री निर्मला सीतारामन यांच्यासह अन्य केंद्रीय मंत्र्यांनी बारामतीचे सातत्याने दौरे केले. राष्ट्रवादी काँग्रेस दुभंगल्याने बारामतीमध्ये शरद पवार यांना घेरण्यासाठीचे प्रयत्न सुरू झाले आहेत. त्याचाच एक भाग म्हणून मोदींची सभा घेण्याच्या हालचाली सुरू झाल्या आहेत.
सन २०१४ मध्ये महायुतीकडून राष्ट्रीय समाज पक्षाचे महादेव जानकर यांनी निवडणूक लढविली होती. या निवडणुकीत सुप्रिया सुळे ६५ हजार मतांनी निवडून आल्या होत्या. मात्र, मोदी लाटेत जानकर यांनी सुळे यांना कडवी लढत दिली होती. त्या वेळीही बारामतीमध्ये मोदी यांची सभा घेण्याचे नियोजित होते. मात्र, ती सभा रद्द झाली होती. सध्याच्या बदलत्या राजकीय परिस्थितीत मात्र मोदींची सभा घेण्याचा चंग महायुतीच्या पदाधिकाऱ्यांनी बांधला आहे.